Góðir vinnustaðafundir
Fulltrúar AFLs og RSÍ mættu á þrjá vinnustaðafundi með starfsmönnum ALCOA Fjarðaáls í gær. Trúnaðarmenn félaganna auglýstu fundina, sem verða 5 í allt. Í gær voru fundir með dagvinnufólki, A vakt og C vakt og alls sóttu tæplega 100 starfsmenn þá.
Tvö meginmál voru til umfjöllunar á fundunum - þ.e. laun og erfiðleikar sem fyrirtækið hefur átt við að etja við að koma launafærslum í rétt horf og síðan uppsagnir starfsmanna að undanförnu - sem m.a. hafa orðið fréttaefni í fjölmiðlum.
Þrátt fyrir að erfiðlega hafi gengið að koma launaútreikningi í rétt horf og margir ýmist skilja ekki launaseðla og tímaskrift eða telji sig eiga inni leiðréttingar og þrátt fyrir að fyrst núna hilli undir mötuneytisaðstöðu, mátti skilja hjá fundarmönnum mikinn velvilja til fyrirtækisins og jákvætt viðhorf.
Umræddar uppsagnir hafa komið nokkurri umræðu af stað meðal starfsmanna en fyrkrtækið hefur endurskoðað verklagsreglur við uppsagnir og voru nokkur atriði þeirra kynnt á fundinum - þ.á.m. aðkomu trúnaðarmanna starfsmanna.
Fundirnir voru vel heppnaðir og urðu fjörugar umræður um ýmis atriði.
Námskeið og ófærð
Fimmtán félagar í AFLi sitja nú bræðslunámskeið á Breiðdalsvík. Leiðbeinandi á námskeiðið sat veðurtepptur í Reykjavík í kvöld en kemur með fyrstu vél austur. Staðgengill var fundinn til að hlaupa í skarðið á meðan.
Formannafundur Sjómannasambandsins
Fulltrúar AFLs Stephen Johnson, Björgvin Erlendsson og Sverrir M. Albertsson á formannafundi sjómannasambandsins sem haldinn var 26 og 27 okt.
Björgvin var kjörinn formaður Sjómannadeildar AFLs á stofnfundi félagsins í apríl sl. Stephen var formaður Sjómannadeildar Vökuls fyrir sameiningu félaganna og Sverrir er starfsmaður AFLs. Stofnfundur Sjómannadeildarinnar er fyrirhugaður næstu vikurnar.
AFL og RSÍ. Vinnustaðafundir hjá ALCOA
Fulltrúar AFLs og RSÍ hefja í dag röð vinnustaðafunda með starfsmönnum ALCOA. Fyrsti fundurinn verður í dag kl. 15:00 þar sem fundað verður með dagvinnufólki en síðan verður haldinn fundur með starfsfólki C vaktar kl. 19:00 og A vaktar kl. 20:00. Fundunum verður framhaldið eftir helgi og þá fundað með starfsmönnum B og D vaktar.
Dagskrá fundanna hefur verið auglýst og er á þessa leið:
1. Staða mála við leiðréttingar á launum og tímaskrift vakta.
2. Uppsagnir starfsmanna.
3. Kosningar trúnaðarmanns iðnaðarmanna - járniðnað.
4. Önnur mál.
Fundað með ALCOA
Fulltrúar AFLs og trúnaðarmenn hjá ALCOA Fjarðaál ásamt fulltrúum Rafiðnaðarsambands Íslands og trúnaðarmönnum héldu fund með forsvarsmönnum ALCOA Fjarðaál í gær þar sem farið var yfir uppsagnir tveggja starfsmanna sem fjallað hefur verið um í fjölmiðlum að undanförnu.