Mikill einhugur er í samninganefnd bræðslumanna AFLs og Drífanda. Samninganefndin hittist á fundi nú síðdegis og fór yfir stöðuna í viðræðum við SA og í ljósi frétta um viðræður ASÍ og SA í gær. Trúnaðarmenn félaganna í 8 bræðslum sátu fundinn, en fundarmenn voru staðsettir víða um land og nýttu símtæknina við fundinn.
Samtök Atvinnulífsins hafa tekið stefnu sem ekki er hægt að túlka öðruvísi en grímulausa ögrun gagnvart samtökum launafólks, gagnvart ríkisstjórn og raunar almenningi öllum. Það uppnám sem nú er á vinnumarkaði þar sem þegar eru boðuð verkföll og fleiri verkfallsboðanir í undirbúningi, verður ekki rakið til neins annars en „harðlínustefnu“ SA.
Fulltrúi AFLs og Drífanda hefur sett sig í samband við Færeyska Alþýðusambandið og mun á morgun senda formlega beiðni um löndunarbann á íslensk uppsjávarskip í færeyskum höfnum á meðan verkfalli bræðslumanna á Íslandi stendur. Þá munu félögin hafa samband við systursambönd Alþýðusambandsins í Danmörku og Noregi en afkastamiklar fiskimjölsverksmiðjur eru í báðum löndunum.
Þegar atkvæðagreiðsla um verkfallsboðun í fiskimjölsverksmiðjum stendur sem hæst á Austurlandi og Vestmannaeyjum er við hæfi að fara yfir helstu atriði í málinu:Samtök atvinnulífsins hafa farið mikinn í fjölmiðlum vegna „ofurlauna“ starfsmanna fiskimjölsverksmiðja og háum launakröfum.
Á sama tíma hefur kröfum okkar verið hafnað og málamyndatilboð sett fram á móti. Skoðun okkar er því að verulega skorti á samningsvilja Samtaka Atvinnulífsins og að ef tjón verður vegna verkfallsins má skrifa það tjón á Samtök atvinnulífsins sem létu frá sér gullið tækifæri sl. laugardag til að ná góðum samningi.
Boðað hefur til fundar hjá ríkissáttasemjara á morgun kl. 14:00 í bræðsludeilu AFLs og Drífanda við SA. Fundur stóð í dag frá 14:00 til 18:30 undir stjórn ríkissáttasemjara.
Ríkissáttasemjari hefur boðað samningamenn AFLs og Drífanda og Samtaka Atvinnulífsins til fundar kl. 14:00 á morgun laugardag. Fyrsti "formlegi" sáttafundur í deilu bræðslumanna félaganna við SA var haldinn í dag undir forstæti ríkissáttasemjara.
