ALCOA samningar samþykktir með yfirburðum

Nýgerður vinnustaðasamningur AFLs og Rafiðnaðarsambandsins við ALCOA Fjarðaál voru samþykktir með miklum meirihluta atkvæða.  Atkvæði félagsmanna voru talin úr einum potti og fór atkvæðagreiðslan sem hér segir

Á kjörskrá voru 457 og greiddu 331 atkvæði eða 72,43%

Já sögðu 310 eða 93,66% greiddra atkvæða, nei sögðu 15 eða 4,53% og auðir og ógild atkvæði voru 6 eða 1,81% atkvæða.

Þetta er talsvert yfir væntingum forystu félaganna þrátt fyrir að menn hafi skynjað almenna ánægju með samningana og átt von á því að þeir yrðu samþykktir.  Fjölmenn samninganefnd félaganna kom að gerð samninganna og hafa samningamenn einnig verið drjúgir í að kynna samninginn fyrir samstarfsfólki hjá ALCOA Fjarðaál. Eiga því samninganefndarmenn þakkir skyldar fyrir vel unnin störf í samningaferlinu og að því loknu.  Þá ber að þakka framlag ríkissáttasemjara sem hélt samningafundi á Austurlandi.

Samningaferlið hefur verið langt og þungt í vöfum.  Samningar hafa verið lausir síðan 1. mars í fyrra og voru samningaviðræður lengi í gang - m.a. vegna Covid.  Þá varð ágreiningur um túlkun á orlofsrétti vaktavinnumanna eftir vinnutímastyttingu síðustu kjarasamninga og endaði sú deila fyrir Félagsdómi þar sem félögin töpuðu málinu.  Loks vísuðu félögin deilunni til ríkissáttasemjara í desember og fóru þá hlutirnir að gerast hraðar.