Samið við sveitarfélögin – án AFLs

Starfsgreinasamband Íslands f.h. aðildarfélaganna 18 hefur á liðnum mánuðum verið í viðræðum við Samband Íslenskar sveitarfélaga um endurnýjun kjarasamnings milli aðila sem runnu út í lok mars s.l.

Í gær var skrifað undir nýjan kjarasamning til fjögurra ára, en viðræðum hafði áður verið vísað til ríkissáttasemjara. AFL starfsgreinafélag dró umboð sitt til baka frá Starfsgreinasambandinu áður en skrifað var undir vegna deilu um sérákvæði við Sveitarfélagið Hornafjörð sem engar viðræðum hafa fengist um.

Sérákvæði eiga sér forsögu og eru frá þeim tíma þegar samið var sérstaklega við hvert sveitarfélag fyrir sig. Þegar gerður var miðlægur kjarasamningur fyrir ca tveim áratugum síðan var það samkomulag milli stéttarfélagsins og viðkomandi sveitarfélags að halda í ýmis ákvæði sem eru fjölmörg í kjarasamningum við hin ýmsu sveitarfélög. Ekkert sveitarfélag hefur leitast við að losna undan þessum eldri ákvæðum nema Sveitafélagið Hornafjörður sem nú gengur fram og svíkur gamalt samkomulag.

Til að bíta höfuðið af skömminni hafa forsvarsmenn sveitarfélagsins neitað að ræða málið og sýna þar í verki virðingarleysi við starfsmenn sveitarfélagsins.

Það að umboðið var dregið til baka þýðir, að ósamið er við öll sveitarfélögin á félagssvæði AFLs vegna afstöðu Hornafjarðarbæjar.