Fjarðabyggð fellur frá áður boðuðum hækkunum á gjaldskrá.

Bæjarráð Fjarðabyggðar hefur ákveðið að fella úr gildi hækkun á gjaldskrám leikskóla, skóladagheimila og tónlistarskóla sem taka áttu gildi um áramótin.
Í greinargerð bæjarráðs segir að sveitarfélagið Fjarðabyggð vilji leggja sitt af mörkum til þess að verðlag haldist stöðugt í landinu og afturkalli því hækkanir á umræddum gjaldskrám. 

Djúpavogshreppur, Fljótsdalshreppur, Borgarfjarðarhreppur hækkuðu ekki sínar gjaldskrár um áramótin og Fljótsdalshérað og Langanesbyggð hækka ekki gjaldskrár aðrar en sorpgjöld.
Sveitarfélagið Hornafjörður hækkar gjaldskrár að hluta og Seyðisfjarðarkaupstaður einnig eða um 3%.
Vopnafjarðarhreppur hækkar gjaldskrá um 3.5%
Breiðdalshreppur réði til sín ráðgjafa um endurskipulag fjármála sveitarfélagsins að kröfu eftirlitsnefndar um fjármál sveitarfélaga. Sveitarfélagið hækkar gjaldskrá að hluta.

AFL ítrekar mikilvægi þess að sveitarfélögin taki þátt í meginmarkmiði nýgerðra kjarasamninga nái fram að ganga, það er að ná niður verðbólgu.
Því þurfa þau að halda aftur af sér í gjaldtöku.