Góður sigur í Héraðsdómi Austurlands
Félagsmanni AFLs Starfsgreinafélags fékk umtalsverðan „launaauka“ með dómi Héraðsdóms Austurlands sem kveðinn var upp í gær. AFL Starfsgreinafélag höfðaði málið fyrir hönd félagsmannsins sem ráðin var á hótel á félagssvæðinu í fyrrasumar og vann á „tvískiptum“ vöktum – þ.e. hluta vinnudagsins að morgni og hluta seinnipart dagsins.
Um þetta fyrirkomulag hafa verið deilur milli aðildarfélaga ASÍ og hótelhaldara um nokkurt skeið – en túlkun AFLs Starfsgreinafélags er að óheimilt sé að skipta vinnudegi með þessum hætti. Félagið krafði því hótelið um laun fyrir tímana sem voru á milli vaktanna þannig að greitt yrði frá upphafi vinnudags til loka. Einnig krafðist félagið greiðslu fyrir frítökurétt vegna skerðingar á hvíldartímaákvæðum, vetrarfrí vegna vinnu á stórhátíðardögum og greiðslu vegna skerðingar á ákvæðum um vikulegan frídag.
Dómurinn féllst á allar kröfur félagsins og dæmdi hótelið að auki til greiðslu á málskostnaði. Þriggja mánaða áfrýjunarfrestur er á málinu - en búast má við að dómurinn hafi nokkuð fordæmisgildi verði honum ekki árfrýjað.
AFL hvetur félagsmenn sem er boðið er að vinna tvískiptar vaktir til að vera í sambandi við næstu skrifstofu okkar.
Dómur Héraðsdóms Austurlands um tvískiptar vaktir 19/03/2014,15:36 946.57 Kb
