Ráðist á starfsfólk AFLs

Veitingamaðurinn á Café Margaret á Breiðdalsvík réðst í morgun á framkvæmdastjóra AFLs Starfgreinafélags, Sverri Albertsson, á skrifstofu félagsins á Egilsstöðum. Tilefni árásarinnar er frétt er 24 stundir fluttu í síðustu viku um félagsleg niðurboð starfsfólks á ónefndu veitingahúsi á Austurlandi. Með fréttinni birti blaðið mynd af Café Margaret og sagði að samkvæmt heimildum blaðsins væri þetta veitingahúsið sem við væri átt.

Veitingamaðurinn kom inn á skrifstofu AFLs í morgun og var mjög æstur. Áður en hann hafði getið um erindi sitt sópaði hann öllum skjölum og gögnum af borði Sverris og er Sverrir stóð upp og reyndi að róa manninn og biðja hann að fara út af skrifstofunni tókust stympingar með þeim.
Sverri tókst að halda manninum og koma í veg fyrir frekari spjöll og meiðsli þar til aðstoð barst en Skúli Björn Gunnarsson, forstöðumaður menningarsetursins Gunnarsstofnunar á Skriðuklaustri, var á næstu grösum svo og Sigurður Ragnarsson, sem rekur tölvu-og bókhaldsfyrirtæki á sama gangi og skrifstofa AFLs er.

Kallað var á lögreglu og samþykkti veitingamaðurinn að bíða hennar en lét sig hverfa í því að lögreglan kom á vettvang.
Formaður AFLs, Hjördís Þóra Sigurþórsdóttir, sem venjulega hefur aðsetur á Höfn, Hornafirði, var á skrifstofu félagsins og varð vitni að árásinni. Í kjölfarið hefur hún ritað sýslumanni bréf þar sem hún kærir þessa árás og rifjar upp margra ára kærur og ábendingar félagsins á liðnum árum vegna gruns um brot á lögum um atvinnuréttindi útlendinga og gruns um skattalagabrot.

Á meðfylgjandi mynd má sjá hvernig umhorfs er á skrifstofu Sverris á meðan hann fær sér kaffi og hefur andlegan undirbúning að tiltekt. Að sögn samstarfsfólks hans er fátt svo illt að ekki boði gott – og neyðist framkvæmdastjórinn nú til að koma skikki á skjalabunka sína.