Uppsögnum Fossvíkur mótmælt

Sl. föstudag mótmælti AFL Starfsgreinafélag uppsögnum 8 starfsmanna Fossvíkur og tilkynnti í bréfi að starfsfólk fyrirtækisins tæki við uppsagnarbréfunum með fyrirvara um lögmæti þeirra. AFL telur uppsagnirnar vera ólögmætar þar sem um þessar mundir eru að verða aðilaskipti á rekstri fyrirtækisins.

Samkvæmt lögum nr. 72, 2002, um réttarstöðu starfsmanna við aðilaskipti að fyrirækjum, eru uppsögnum starfsfólks eða hluta starfsfólks settar ákveðnar skorður. Uppsögn hluta starfsfólks Fossvíkur er að mati AFLs tilraun til að skerða rétt starfsmanna er lögin tryggja.

Nokkuð hefur borið á því að undanförnu að fyrirtæki hafi með samningum sín í milli, við eigendaskipti, reynt að koma sér hjá ábyrgð er lögin leggja þeim á hendur. AFL mun gæta hagsmuna félagsmanna sinna hjá Fossvík og er í stöðugu sambandi við trúnaðarmann starfsfólks á staðnum, Hönnu Ingólfsdóttir, en hún er jafnframt varamaður í stjórn AFLs.