Námsver á Reyðarfirði

AFL Starfsgreinafélag samþykkti á stjórnarfundi sínum í gærkvöld kaup á húsinu að Búðareyri 1, Reyðarfirði. Húsið  er 726 fm og eru samningar milli AFLs, Fjarðabyggðar, Verkmenntaskóla Austurlands og Þekkingarnets Austurlands, um starfrækslu námsvers í húsinu á lokastigi. Í samþykkt AFLs kemur fram að leigutekjur vegna námsversins muni standa undir þessari fjárfestingu.

Áformað er að AFL muni flytja skrifstofu sína á Reyðarfirði í húsið og losa um leiguhúsnæði og mögulega selja húseign sína á Reyðarfirði í kjölfarið. Þá hefur m.a. Þekkingarnetið falast eftir skrifstofuhúsnæði í þessu húsi.

Stjórnarfundur AFLs var haldinn á Vopnafirði í gærkvöld og byrjaði stjórn félagsins á skoðunarferð um uppsjávarfrystihús HB Granda í fylgd Höskuldar Haraldssonar, starfsmanns Granda svo og trúnaðarmanna AFLs hjá fyrirtækinu, Steinnunni Zöega og Kristjáni Guðjónssyni. Að fundi loknum var síðan snæddur kvöldverður í Kaupvangi, í safni bræðranna Jóns Múla og Jónasar Árnasona. Kristján Magnússon, ritari í stjórn AFLs, sá um matseldina og Grétar Ólafsson, formaður sjómannadeildar, sýndi áður óþekkta takta í þjónustu og tók virkan þátt í uppvaski.

Á myndinni er Höskuldur lengst til vinstri, þá Sævar Örn Arngrímsson, formaður Iðnaðarmannadeildar AFLs, þá Reynir Arnórsson, Djúpavogi, Hjördís Þóra formaður, skælbrosandi í forgrunni, og á bak hennar grillir í Stefaníu Stefánsdóttur, Seyðisfirði og Jónu Járnbrá Jónsdóttir, formann Verkamannadeildar AFLs.