Samninganefnd AFLs í viðbragðsstöðu!

Fulltrúar í samninganefnd AFLs Starfsgreinafélags eru beðnir um að vera viðbúnir að mæta á fund nefndarinnar með stuttum fyrirvara - en til greina kemur að fundur verði boðaður með mjög stuttum fyrirvara nú fyrir helgi.

Nú standa yfir viðræður um svokallaðan "kreppusáttmála" aðildarfélaga Alþýðusambandsins og Samtaka Atvinnulífsins með þátttöku annarra launþegasamtaka og ríkisvalds. Þegar ljóst er hvort samkomulag hefur tekist verður samninganefnd AFLs boðuð til fundar til að ræða afstöðu félagsins til sáttmálans.

Sáttmálanum mun fylgja samkomulag um framkvæmd gildandi kjarasamnings aðila með tvískiptingu umsaminna launahækkana. Ákvörðunarvald um framlengingu samninga liggur hjá samninganefnd Alþýðusambandsins sem óskað hefur eftir afstöðu félaga og verður stuðst við "vegið hlutfall" félaga innan hvers landssambands í afgreiðslu samninganefndar ASÍ.

Það er hverju félagi í sjálfsvald sett hvernig það tekur afstöðu - þ.e. hvort samninganefnd félagsins afgreiðir málið eða hvort því verður vísað til allsherjaratkvæðagreiðslu innan félagsins - en úrslit slíkra kosninga munu ekki ráða úrslitum í afgreiðslu samninganefndar ASÍ heldur aðeins vikta þar inn í samræmi við stærð viðkomandi félags. Þannig gætu félagsmenn eins eða fleiri félaga fellt samkomulagið en engu að síður verið bundin af ákvörðun samninganefndar ASÍ.