AFL undirbýr stefnur á hendur sjóðsstjórum

Stjórn AFLs Starfsgreinafélags hefur ákveðið að fela lögmönnum félagsins að stefna umsjónarmönnum peningamarkaðssjóðs Landsvaka vegna þess tjóns sem félagið varð fyrir við uppgjör sjóðsins. Tilefni stefnunnar er að félagið telur að sjóðsstjórar Landsvaka hafi blekkt félagið til fjárfestinga þegar ljóst var að áhættudreifing var óásættanleg. Grundvöllur málshöfðunar er að félagið telur að umræddir sjóðsstjórar hafi blekkt félagið til áframhaldandi viðskipta þegar ljóst var að eignasafn sjóðsins var ekki í samræmi við lýsingar og sjóðurinn stefndi í óefni.  Ennfremur telur félagið að verulega óeðlilegt útstreymi hafi verið síðustu fjóra daga í starfsrækslu sjóðins og ljóst að innherjaupplýsingar hafi haft áhrif sem juku enn á tap annarra. 

Grundvöllur málshöfðunarinnar eru gögn er AFL Starfsgreinafélag hefur fengið afhent frá Landsbankanum í kjölfar málshöfðunar félagsins á hendur bankanum til að fá afhentar upplýsingar um samsetningu eigna sjóðsins vikurnar fyrir hrun. Þær upplýsingar fengust afhentar fyrir skömmu.

 

Eftirfarandi samþykkt var gerð á fundi stjórnar AFLs sem var að ljúka.  Stjórn AFLs Starfsgreinafélags felur framkvæmdastjóra félagsins í samráði við lögmenn AFLs að undirbúa og hefja málsókn á hendur þeim sjóðsstjórum Landsvaka sem önnuðust um sjóði félagsins og upplýsingagjöf til AFLs. Ennfremur samþykkir stjórn AFLs að fela lögmönnum félagsins að gæta hagsmuna félagsins gagnvart uppgjöri Landsbankans þar sem svo virðist sem reglur Landsvaka um áhættudreifingu hafi verið brotnar. Stjórn AFLs Starfsgreinafélags samþykkir að fela  lögmanni AFLs, að ganga frá sátt við Landsbanka Íslands / Landsvaka vegna málshöfðunar AFLs varðandi upplýsingar um meðferð peningamarkaðssjóða Landsvaka.