Einhugur í bræðslumönnum!

Mikill einhugur er í samninganefnd bræðslumanna AFLs og Drífanda. Samninganefndin hittist á fundi nú síðdegis og fór yfir stöðuna í viðræðum við SA og í ljósi frétta um viðræður ASÍ og SA í gær. Trúnaðarmenn félaganna í 8 bræðslum sátu fundinn, en fundarmenn voru staðsettir víða um land og nýttu símtæknina við fundinn.

Niðurstaða fundarins var að viðræður ASÍ og SA breyta litlu varðandi samningamál bræðslumanna enda óljós hvað felist í þeim.

Samninganefndin sér ekki ástæðu til að mæta öll á boðaðan samningafund nk. mánudag, þar sem síðasta fundi lauk án árangurs,  en sendir í staðinn tvo samningamenn. Samninganefndarmenn eru þó í viðbragðsstöðu þokist mál eitthvað á fundinum.

Fundur trúnaðarmannanna fór að mestu í að skipuleggja verkfallsvörslu og fara yfir aðstæður á hverjum stað. Austfirðingar munu líklega senda nokkra menn til Vestmannaeyja, til að aðstoða við verkfallsvörslu þar og ennfremur verða menn frá AFLi og Drífanda í Helguvík og á Þórshöfn.