Hiksti í samningaviðræðum!

Samningaviðræður AFLs við viðsemjendur eru að mestu í biðstöðu þessa dagana - en þó ganga viðræður félagsins við ALCOA Fjarðaál skv. áætlun og er ennþá stefnt að því að ljúka samningum við fyrirtækið í byrjun maí eins og samkomulag félagsins við ALCOA í desember sl. gerði ráð fyrir. Fundum um almenna kjarasamninga hefur verið frestað og sérkjarasamningaviðræður eru flestar í biðstöðu.

Fundi SGS og SA sem vera átti í gær var frestað til föstudags en ólíklegt má telja að samið verði fyrr en niðurstöður úr "Icesave" kosningum liggja fyrir. Í gær var fundur AFLs og Eimskipafélagsins vegna Mjóeyrarhafnar og hefur þokast mjög í þeim viðræðum en þó standa nokkur atriði eftir sem ekki hefur náðst sátt um. Sáttasemjari sleit því fundi í gær og boðaði ekki annan fund. Ekki hefur verið boðaður fundur í kjaradeilu AFLs og Drífanda við SA vegna fiskimjölsverksmiðja en tveir árángurslausir fundir hafa verið haldnir eftir að boðuðu verkfalli var aflýst.

Samningaviðræður við ríki og sveitarfélög eru í hægagangi enda bíða aðilar eftir að aðalkjarasamningi við SA ljúki áður en búast má við að skriður komist á þær viðræður.

Kjarasamningar hafa almennt verið lausir síðan 1. desember sl..