Starfsmenn og stjórn AFLs fer í dag í stutta starfsmannaferð og er það fyrsta sinn frá upphafi Covid faraldurs sem þessi hópur kemur saman.  Skrifstofur félagsins á Egilsstöðum, Vopnafirði og Reyðarfirði verða því lokaðar eftir hádegi í dag.  Opið verður til kl. 14 á Neskaupstað og til 16 á Höfn.

Myndin:  Af fréttibréfi AFLs í síðustu viku.

Starfsmenn Íslandshótela fara nokkuð á milli hótela en eru ekki aðgreindir á skilagreinum til stéttarfélaga, þannig að AFLi er ómögulegt að vita hvort einhverjir félagsmanna AFLs eru nú við vinnu á þessum hótelum.

Ef svo er – eiga viðkomandi starfsmenn að leggja niður vinnu með Eflingarfélögum. Þeir félagsmenn AFLs sem þannig leggja niður vinnu – geta síðan sótt um verkfallsbætur til AFLs.

Við munum senda erindi á alla starfsmenn Íslandshótela sem eru í AFLi og vekja athygli þeirra á þessu. Jafnframt munum við beina því til þeirra að félagsmenn AFLs gangi ekki í störf félaga okkar í Eflingu sem leggja niður störf. Ef átök Eflingar og SA harðna svo í kjölfarið og boðað verður til umfangsmeiri verkfalla, þ.m.t. starfsmanna við almenna ræstingu – verður íbúðum AFLs við Stakkholt lokað.

Þeir félagsmenn sem eru í íbúðum þegar verkfall skellur á – verður leyft að ljúka dvöl sinni þar, en leigur sem  byrja eftir að verkfall hefst, verða felldar niður og félagsmönnum AFLs endurgreidd leigan. Íbúðirnar munu því lokast smátt og smátt og loks verður húsinu öllu lokað á meðan verkfalli stendur. Við beinum því líka til félagsmanna AFLs að gista ekki á einum af þessum hótelum sem fyrsta verkfallið nær til – á meðan á því stendur.

AFL Starfsgreinafélag skorar á ríkissáttasemjara að draga til baka miðlunartillögu í kjaradeilu Eflingar og Samtaka Atvinnulífsins og gefa deiluaðilum tækifæri til að útkljá deiluna.  Það eru engin efnisleg rök fyrir miðlunartillögunni á þessum tímapunkti.  Atkvæðagreiðsla um verulega takmarkað verkfall stendur yfir, hvorki þjóðarhagsmunir né almannahagsmunir eru í hættu.

Krafa ríkissáttasemjara um kjörskrá Eflingar er krafa um persónu-og atvinnuupplýsingar félagsmanna Eflingar og möguleika til úrvinnslu úr þeim skrám.  Hér er um að ræða „viðkvæmar persónuupplýsingar“ samkvæmt persónuverndarlögum og mjög vafasamt skref er stigið af embætti sáttasemjara í átt að íhlutun um innri málefni verkalýðsfélaga.  

Þar sem nú er að hefjast atkvæðagreiðsla um verkfall starfsfólks ræstingafyrirtækja í Reykjavík - o.þ.á.m. Sólar ehf., sem annast ræstingu í orlofsíbúðum AFLs við Stakkholt, höfum við lokað fyrir nýjar bókanir í Stakkholti frá 27. febrúar og fram að 15. mars.  Þeir sem þegar hafa bókað á þessum tíma - fá skilaboð á næstu dögum um að mögulega verði leiga þeirra felld niður og endurgreidd.  Komi til verkfalls og það stendur lengur en til 15. mars - verða þær leigur sem þegar er búið að bóka og lenda á "verkfallstíma" felldar niður og endurgreiddar.

Þeir sem eru í Stakkholdi þegar verkfall hefst - verður leyft að ljúka sinni dvöl þar -enda eru íbúðir ekki ræstar á meðan leigu stendur.

AFL Starfsgreinafélag hefur í samningi sínum við Sólar ehf ákvæði um að starfsmenn sem vinna að ræstingu í Stakkholti séu félagar í Eflingu og njóti að lágmarki kjara í samræmi við gildandi kjarasamninga.

Það verða samt engar leigur felldar niður fyrr en í síðustu lög og þegar fyrirsjáanlegt er að ekki muni vera unnt að ræsta þær fyrir upphaf leigu - jafnvel þó að verkfalli ljúki skyndilega.  Fari svo að verkfallsboðun verði ekki samþykkt í atkvæðagreiðslu Eflinga - verður strax opnað fyrir bókanir aftur.

Miðstjórn Alþýðusambands Íslands gagnrýnir harðlega stýrivaxtahækkun Seðlabankans sem tilkynnt var í morgun. Meginvextir bankans eru nú 6,5% og hafa ekki verið hærri í þrettán ár. Hækkunin kemur í kjölfar vaxandi verðbólgu en hækkun vísitölunnar í janúar mátti fyrst og fremst rekja til ákvarðana ríkisstjórnarinnar. Miðstjórn ASÍ mun boða til formannafundar til að ræða viðbrögð og aðgerðir.
Verðbólga mælist 9,9%. Miðstjórn hafnar því að skýringuna sé að finna í kjarasamningum á almenna vinnumarkaðinum. Aðilar vinnumarkaðarins voru sammála um að samningarnir myndu ekki ýta undir verðbólgu. Seðlabankinn verður að líta sér nær, að stórum hluta má rekja verðbólguna til heimatilbúinnar fasteignabólu og alþjóðlegra verðhækkana.

Miðstjórn Alþýðusambandsins hefur áður vakið á því athygli að hér eru ekki að verki óumbreytanleg lögmál. Ríkisstjórn Íslands ákvað með samþykki þeirra þriggja stjórnmálaflokka sem að henni standa að blása í glæður verðbólgu með hækkunum á ýmsum sköttum og gjöldum. Nú blasa afleiðingar þeirra fráleitu ákvörðunar við almenningi. Vextir hækka, húsnæðislánin og húsaleiga verða enn þyngri í vöfum og kjörin verri en áður. Allt eru þetta mannanna verk og líkt og jafnan koma slíkar aðgerðir verst niður á þeim sem búa við erfiðustu afkomuna.

Aðgerðarleysi ríkisstjórnar Katrínar Jakobsdóttur gengur þvert á viðtekin viðbrögð í nágrannalöndum þar sem ráðamenn beita tækjum ríkisvaldsins til að lina áhrif afkomukreppunnar og vinna skipulega að því að hemja verðbólgu. Í þeirri staðreynd birtist forgangsröðun ríkisstjórnarinnar og sinnuleysi gagnvart afkomu fólksins í landinu.