Framkomnar hugmyndir um breytingar á greiðslum bóta til atvinnulausra eru fráleitar að mati miðstjórnar ASÍ. Í hugmyndunum felast verulegarbreytingar á högum atvinnulausra - sérstaklega þeirra yngri. Miðstjórn ASÍ hefur hafnað þessum hugmyndum og hvatt stjórnvöld til að endurskoða forgangsröð verkefna og tryggja meira fé til vinnumarkaðshugmynda. Ennfremur árettar miðstjórn kröfu Alþýðusambandsins um að verkalýðshreyfingin axli ábyrgð á framkvæmd atvinnuleysisbótakerfisins svo og vinnumarkaðsaðgerða.

Sjá nánar á síðu ASÍ

Sigurrós Kristinsdóttir, varaformaður Eflingar, verður með upplýsinga- og kynningarfund um "Velferðarvaktina"  fyrir trúnaðarmenn AFLs, stjórn og starfsfólk nk. fimmtudag kl. 18:00. Aðrir félagsmenn eru og velkomnir. Velferðarvaktin var sett á stofn í febrúar sl. af félags-og tryggingamálaráðherra til að fylgjast með félagslegum jafnt sem fjárhagslegum afleiðingum bankahrunsins fyrir fjölskyldur og einstaklinga í landinu með markvissum hætti og gera tillögur um aðgerðir í þágu heimilanna.

Benedikt Davíðsson, fyrrverandi forseti Alþýðusambands Íslands, lést í nótt eftir langvarandi veikindi.

Benedikt var formaður Trésmiðafélags Reykjavíkur en hóf fyrst störf fyrir verkalýðshreyfinguna 1953 þegar hann tók til starfa á skrifstofu Trésmiðafélags Reykjavíkur.  Hann sat í miðstjórn ASÍ og var formaður ASÍ um árabil og gengdi auk þess fjölda trúnaðarstarfa fyfir verkalýðshreyfinguna.

Hann var mikill áhugamaður um uppbyggingu lífeyriskerfis verkalýðshreyfinguna og málefni sjúkrasjóða.

Þeim málum sem AFL Starfsgreinafélag hefur rekið fyrir hönd félagsmanna sinna gagnvart verktakafyrirtækinu Impregilo vegna vinnuslysa og annarra mála við framkvæmdir við Kárahnjúkastíflu er lokið. Í júlí sl. féll dómur í Héraðsdómi Reykjavíkur í einu máli og kaus Impregilo að áfrýja ekki og hefur náðst sátt um uppgjör í kjölfar þess dóms og síðasta málinu lauk með sátt nú fyrir skömmu.

"Stjórn AFLS Starfsgreinafélags krefst þess að umsamin hækkun persónuafsláttar komi til framkvæmda um áramót. Einnig krefst stjórnin þess að áður umsamin verðtrygging á persónuáfslátt haldi. Hlífa verður þeim sem lægstar hafa ráðstöfunartekjurnar við frekari álögum eins og kostur er." - Stjórn AFLs Starfsgreinafélag samþykkti eftirfarandi ályktun á fundi sínum á miðvikudag. Ályktunin er samþykkt í kjölfar umræðu um skattahækkanir þar sem m.a. hafa verið uppi hugmyndir um að falla frá hækkun persónuafsláttar gegn lægri álagningaprósentu.